ၼႂ်းတပ်ႉၽွမ်ႉႁူမ်ႈၸိုင်ႈတႆး

 ၼႂ်းတပ်ႉၽွမ်ႉႁူမ်ႈၸိုင်ႈတႆး

ၵွၼ်းၸိူင်း (မူဝ်ႁိူင်း)             ႁူဝ်ပဝ်ႈလူင်။

ၵျႃႇၼူႉ       (သႅင်သိုၵ်း)         ၵႅမ်ႁူဝ်ပဝ်ႈ။

ၸဝ်ႈသိုၵ်းလူင်ပူဝ်ႇဝ  ပဵၼ်ၽူႈၸတ်းၵၢၼ်ၽၢႆႇသိုၵ်းသေ ၶဝ်ႈပႃး ၸၢႆးပလွင်ႈ၊ ပူဝ်ႇၵၢၼ်းၸဵတ်း၊ သၢႆဝၼ်းလႄႈသၢႆမိူင်းၶဝ်ၸိူဝ်းၼႆႉ  ၽွတ်ႈႁႅၼ်း ၵေႃႇမီႇတီႇ ၽွမ်ႉႁူမ်ႈယဝ်ႉ တိူင်ႉၼိုင်မႃးတၢင်းမိူင်းၵိုင်၊ လႆးၶႃႈ၊ မိူင်းယွၼ်း၊ မိူင်းလၢင်း၊ ၼၼ်ႉယူႇယဝ်ႉ။

           ၼႂ်းပီ 1961 ၼီႈၼၼ်ႉၼင်ႇၵဝ်ႇ၊ ဢၼ်ပဵၼ်မုၼ်ၸဝ်ႈ ဢူးၵုၼ်ႇတလ (ၸဝ်ႈငႃးၶမ်း) ဢွၼ်ႁူဝ် ပူၵ်းတင်ႈမႃး တပ်ႉသိုၵ်းႁၢၼ် ၸိုင်ႈတႆး ၼႂ်းၸေႈတွၼ်ႈၵဵင်းတုင်။ ၵူၼ်းဢွၼ်ႁူဝ် ဢၼ်ၶဝ်ႈပႃး ၼႂ်းလၢႆးလုၵ်ႉၽုိၼ်ႉ ၸႄႈတွၼ်ႈမိူင်းၵေင်းတုင်ၼႆႉၸိုင်-

ၸဝ်ႈႁၢၼ်ထမ်းဝူင်း         မိူင်းသိမ်း။

ယွတ်ႈၶမ်း                      မိူင်းၵႃ   ။

ပူႇၵႄႇပၼ်                   ၵၢတ်ႇဝူင်ႈ။

ၸၢႆးႁၵ်ႉၶိူဝ်း                    ၶုၼ်ၽႃႇလင်ႇၶဵဝ်။

သၢမ်လေႃး                   မိူင်းငႅၼ်း။

သြႃႇဝူၼ်ႇ                     

ၸဝ်ႈဝူၺ်ႉၸၢႆးလၵျေႃႇ    ႁူဝ်ပၢင်ႇ။

      ၸွမ်းၼင်ႇၵူၼ်းဢွၼ်ႁူဝ် "ၸဝ်ႈငႃးၶမ်း" ႁွင်ႉ-ဢူးၵူၼ်ႇတလ ဢွၼ်ႁူဝ် ပူၵ်းတင်ႈမႃး သိုၵ်းႁၢၼ်ၸိုင်ႈတႆး ပွတ်းၸႄႈတွၼ်ႈ မိူင်းၵဵင်းတုင်ယူႇယဝ်ႉ။ သိုၵ်းႁၢၼ်ၸိုင်ႈတႆး ၵဵင်းတုင်ၼႆႉ-ဢဵၼ်ႁႅင်းယႂ်ႇသေ ၽၢႆႇၶိူင်ႈယိပ်းၵွင်ႈၵၢင်ႇၵေႃႈ လႅမ်ႉၵျႃႉတွၼ်းပိူၼ်ႈ။

     ၵူၺ်းၵႃႈ ၵွပ်ႈဝႃႈပၢႆးဝူၼ်ႉတိုၵ်ႉၼုမ်ႇ ဢမ်ႇမီးမူႇပိူင်  ဢမ်ႇဢွၼ်ႁူဝ်လႆႈလႄႈ ၶဝ်ၼင်ႇၵၼ် ႁိမ်ဢႃႇၼႃႇၵၼ်၊ လႆႈၶၢမ်ႇတင်းၵူၼ်းၽၢႆႇတႂ်ႈ ယိုဝ်းတၢႆပႅတ်ႈ ၸဝ်ႈငႃးၶမ်း တီႈႁူၺ်ႈလႆႉ မိူင်းထႆးယူႇယဝ်ႉ။ ဝၢႆးသေ ၸဝ်ႈငႃးလမ်းတၢႆ ၵႂႃႇယဝ်ႉ သုၵ်းႁၢၼ်ၸိုင်ႈတႆး ၵဵင်းတုင်ၼၼ်ႉ ၸုမ်းၼိုင်ႈလႄႈၸုမ်းၼိုင်ႈ ႁၼ်ဢေႇရီႇယႃႇ ၼႃႈလိၼ်ၵၼ်၊ ဢမ်ႇထုၵ်ႇၵၼ်၊ ထိုင်တီႈပေႃးလႆႈႁၢင်ႈသိုၵ်းတေႃႇၵၼ်ယဝ်ႉ။  ၵွပ်ႈၼႆလႄႈ-ႁႅင်းသိုၵ်းၶဝ် ႁၢႆလၢႆၵႂႃႇလွႆလွႆယူႇယဝ်ႉ။

   ထိုင်မႃးပီ- 1963 ၼိႈၼၼ်ႉ၊ တပ်ႉၵွင်မၢႆ (7) ဢၼ်ပူဝ်ႇတေႇဝိၼ်ႇ ဢွၼ်ႁူဝ်တူင်ႉၼိုင် ၼႂ်းၸႄႈတွၼ်ႈ မိူင်းမႃး၊ မိူင်းတွမ်း၊ ၼၼ်ႉၽၢတ်ႇဢွၵ်ႇ ၽၢႆႇတႂ်ႈသုၵ်း(လလသၶ)သေ ၵႂႃႇပူၵ်းတင်ႈထႅင်ႈ " တပ်ႉသုၵ်းၽွမ်ႉႁူမ်ႈၵူၼ်းမူိင်း" ၼၼ်ႉယူႇယဝ်ႉ။

       ထိုင်ၼႃးပီ-1965ၼီႈ၊ ဢၼ်ပဵၼ်ၸဝ်ႈၶုၼ်သႃႇ(ၸၢင်ႈၶျီႈၽူး) ၵႃႇၵွႆႇယေး လွႆမေႃႇၼၼ်ႉ ၽိုၼ်ႉမၢၼ်ႈ သေၶဝ်ႈထိူၼ်ႇ၊ ၶႄႇၽိူၵ်ႇ ၵူဝ်ၶုၼ်သႃႇပေႉပုၼ်ႈ၊ ၸွင်ႇပၼ်ငိုၼ်းၵၼ်ၵွင်ႈတီႈပုဝ်ႇတေႇဝိၼ်ႇ ႁႂ်ႈတိုၵ်းၶုၼ်သႃႇပႅတ်ႈ ၵူၺ်းသမ်ႉဢမ်ႇပေႉ ၶုၼ်သႃႇလႄႈ ပူဝ်ႇတေႇဝိၼ်ႇပၢႆႈၶဝ်ႈလႅင်းၸူးမၢၼ်ႈယူႇယဝ်ႉ။

  ဝၢႆးသေတပ်ႉလွႆမေႃႇ ပေႉပူဝ်ႇတေႇဝိၼ်ႇယဝ်ႉ ၵေႃႈ ၸဝ်ႈၶုၼ်သႃႇ (ၸၢင်ႈၶျီးၽူး) ဢွၼႁူဝ်သေပူၵ်းတင်ႈမႃး တပ်ႉသိုၵ်းတႆး ႁူမ်ႈပွင်း(S.U.A)ယူႇယဝ်ႉ။ ဝၢႆးၼၼ်ႉၸုမ်းလွႆမေႃႇၶဝ် ၶိုၼ်းၶဝ်ႈႁဵတ်း ၵႃႇၵွႆႇယေး ၶိုၼ်းတီႈလွႆမေႃႇသေယဝ်ႉ။ ထိုင်မႃးပီ-1968-69 ၼၼ်ႉ(မၼဝ) တိၺွမ်းတူဝ်ၶုၼ်သႃႇလႄႈ တၵ်ႉသိုၵ်းတႆး ႁူမ်ႈပွင်းၶဝ် ၶိုၼ်းၶဝ်ႈထိူၼ်ႇသေ တိုၵ်းတေႃး(မၼဝ) ယူႇယဝ်ႉ။

    ၸုမ်းတပ်ႉၽွမ်ႉႁူမ်ႈဢၼ် ၸဝ်ႈၵွၼ်းၸိူင်း ဢွၼ်ႁူဝ်ဝႆႉၼၼ်ႉ ၵွပ်ႈဝႃႈတီႈယိူင်းႈဢၢၼ်းၶဝ် မိူၼ်ၵၼ်တင်း (K.M.T) ၶႄႇၽိူၵ်ႇလႄႈ ပွင်းၵၼ်ၵႃႉၶၢႆယူႇ။   ထိုင်မႃးပီ-1964 လိူၼ်ဢေႇပိူဝ်ႇ(24) ဝၼ်း၊ တပ်ႉသိုၵ်း(လလသၶ) လႄႈတၵ်ႉသိုၵ်းၽွမ်ႉႁူမ်ႈ ဢၼ်ၵွၼ်းၸိူင်း၊ ၵျႃႇၼု၊ ဢွၼ်ႁူဝ်၊ ဢိၵ်ႇတၢင်း တပ်ႉသိုၵ်းၸဝ်ႈၾႃႉၵူဝ်းၵၢင်ႉ ဢၼ်ႁွင်ႉဝႃႈ-ၸဝ်ႈလဵဝ်(ယၢင်းၵျီႇသိင်ႇ)ၼၼ်ႉၶဝ်မႃးႁူမ်ႈႁွမ်းၵၼ်သေၸွင်ႇပူၵ်းတင်ႈမႃး တပ်ႉသိုၵ်း ၸိုင်ႈတႆး(S.S.A) တီႈဝဵင်းၵဵင်းမႆႇ၊ မိူင်းထႆးၼၼ်ႉယူႇယဝ်ႉ။

    တႃႇတေ ဢွၼ်ႁူဝ် တပ်ႉသိုၵ်း ၸိုင်ႈတႆးၵႂႃႇၼၼ်ႉ ၸွင်ႇလႆႈ ၽွတ်ႈႁႅၼ်း ၵွင်ႇၸီႇသုၵ်းၸိုင်ႈတႆး၊ မိူၼ်ၼင်ႇၸိုဝ်ႈသဵင်ၸပ်းမႃးတီႈတႂ်ႈၼႆႉယူႇယဝ်ႉ။

ၼၢင်းႁိူၼ်းၶမ်း                                        ႁူဝ်ပဝ်ႈလူင်။

ၶုၼ်တေႃႇတႃႇ                    ၽူႈပွင်ၵၢၼ်သိုၵ်း ငဝ်ႈငုၼ်း။

ၵွၼ်းၸိူင်း                       ၽူႈပွင်ၵၢၼ်သိုၵ်း ၼႂ်းမိူင်းတႆး။

ၸဝ်ႈလႅတ်ႇ                                ၽူႈၵပ်းသိုပ်ႇၼွၵ်ႈမိူင်း။

ၸဝ်ႈသိူဝ်ၶၢၼ်ႇ (ဢုင်းပွင်ႇ)         ၵေႃႇမီႇတီႇပွင်ၵၢၼ်သိုၵ်း။

ၸၢႆးပၼ်(ပိုၼ်းတႆး)                   ၵေႃႇမီႇတီႇပွင်ၵၢၼ်သိုၵ်း။

သိူဝ်ထႅၼ်ႈ                            ၽူႈၵွၼ်းတိူင်း ပွတ်းဢွၵ်ႇ။

ၵျႃႇၼု (သႅင်သိုၵ်း)                  ၽူႈၵွၼ်းတိူင်း ပွတ်းၸၢၼ်း။

ၵူဝ်ႇငႃးမိူင်း                              ၽူႈၵွၼ်းတိူင်း ပွတ်းၵၢင်။

ၽၢႆႇတႂ်ႈၵွင်ႇၸီႇသိုၵ်း ၽွတ်ႈႁႅၼ်းဝႆႉတပ်ႉၸုမ်း(5)ၸုမ်း

တပ်ႉၸုမ်းမၢႆ(1) ပႃးဝႆႉ(3) တပ်ႉၵွင်၊ ဢၼ်ပဵၼ်တပ်ႉၵွင် (4) ၸဝ်ႈၸၢမ်ႇမိူင်း၊ တပ်ႉၵွင်(5) ၸၢႆးပၢၼ်မႂ်ႇ၊တပ်ႉၵွင် (6) ၸဝ်ႈၶုၼ်တွင်း ။ၽူႈၵွၼ်းတပ်ႉၸုမ်း (1) ၸဝ်ႈသိူဝ်လဵၼ်း၊ ၵႅမ်ပဵၼ်ၸဝ်ႈထဝ်ႈ။    တပ်ႉၸုမ်း (1) တႆႉ-တႄႇႇဢဝ် ဢေႇရီႇယႃႇ ၼႃႈလိၼ်သီႊပေႃႉ ၵႂႃႇမိူင်းတႆးပွတ်းႁွင်ႇတင်းသဵင်ႈ။

တပ်ႉၸုမ်း(2) ပႃးဝႆႉတပ်ႉၵွင် (2) ပူဝ်ႇလၢႆးဢူ၊ တပ်ႉၵွင် (3) ၸၢႆးပၢၼ်မႂ်ႇမိူင်းသူႈ၊ တပ်ႉၵွင် (10) ၽူႈၵွၼ်းတပ်ႉ ၸုမ်း (2) ပဵၼ်ၸဝ်ႈသိူဝ်ထႅၼ်ႈ။ ဢဝ်ဢေႇရီႇယႃႇ ၼႃႈတီႈ ပွတ်းတၢင်ႉယၢၼ်း၊ မိူင်းယႆ၊ မိူင်းသူႈ၊မေႃႇၾႃႉ၊ မိူင်းလိူၼ်း။

တပ်ႉၸုမ်း (3) ၶဝ်ႈပႃးဝႆႉတပ်ႉၵွင် (11) တပ်ႉၵွင် (12) တပ်ႉၵွင် (13) ၽူႈၵွၼ်းတပ်ႉၸုမ်း (3) ပေၼ်ၸဝ်ႈၶုၼ်ၵျႃႇၼု၊ ၵႅမ်ပဵၼ် ပူဝ်ႇၵၼ်းၸဵတ်း။  တူင်ႉၼိုင်ၼႂ်းဢေႇရီႇယႃႇ ၼႃႈလိၼ် တႄႇဢဝ် မိူင်းၵိုင် တေႃႇထိုင်မိူင်းတႆးပွတ်းၸၢၼ်း။

တပ်ႉၸုမ်း (4) ၽူႈၵွၼ်းတပ်ႉၸုမ်းပဵၼ် ပူဝ်ႇငႃးမိူင်း၊ ၵႅမ်ၽူႈၵွၼ်းတပ်ႉ ပူဝ်ႇလၢဝ်လႅင်း။  ၶဝ်ႈပႃး တပ်ႉၵွင်မၢႆ (1) သိူဝ်ၸိုင်ႈ၊ တပ်ႉၵွင် (7) သိူဝ်လႄႇမိူင်း၊ တပ်ႉၵွင် (8) သိူဝ်ၵျၢမ်း။     တူင်ႉၼိုင်မႃး ပွတ်းၼႃႈလိၼ် သီႇပေႃႉတင်းသဵင်ႈ လႄႈ ၵေးသီးဝၢၼ်ႈၸၢမ်။

တပ်ႉၸုမ်းမၢႆ (5)  ၸဝ်ႈၶုၼ်ဢွင်ႇ ၵူဝ်းၵၢင်ႉ၊ ဢွၼ်ႁူဝ် ၶဝ်ႈပႃးဝႆႉ တပ်ႉၵွင် (9)  တပ်ႉၵွင် (14) တပ်ႉၵွင် (15)  ၼၼ်ႉသေ၊ တူင်ႉၼိုင် ၼႂ်းတွၼ်ႈၼႃႈလိၼ် ၵူဝ်းၵၢင်ႉ ၼၼ်ႉယူႇယဝ်ႉ။

   ပေႃးတေမႃးထတ်းသၢင်ႈတူၺ်း မိူဝ်ႈတေႇပူၵ်းတင်ႈမႃးတပ်ႉသိုၵ်းၸိုင်ႈတႆး (S.S.A) ၼၼ်ႉ ႁႅင်းတပ်ႉၼႆႉမီးယူႇမွၵ်ႈၵူၼ်း (10ႇ000) မိုၼ်ႇပၢႆသေတ ၵေႃႈ  ၵွပ်ႈဢမ်ႇမီးမူႇမီးပိူင် ဢမ်ႇမီးသဵၼ်ႈတၢင်း လွၵ်းပိူင်ၵၼ် လႄႈသင်၊ ဢမ်ႇမီးလွင်ႈငဝ်ႈငုၼ်း ယိပ်းၵမ်ၸိူၵ်ႈလႄႈသင်။ လၢႆးႁဵတ်း လၢႆးသၢင်ႈ ဢမ်ႇမၢၼ်ႇမႅၼ်ႈလႄႈသင်၊ ၽူႈဢွၼ်ႁူဝ်ၵေႃႈ ပဵၼ်ထၢၼ်ႈၵူၼ်း ပတေႇသရဵၸ်ႈလႄႈသင်၊ ၸွင်ႇဝႃႈ ဢမ်ႇမီးလွင်ႈၶိုၼ်ႈယႂ်ႇ တူဝ်းတွၼ်းမႃးသေဢမ်ႇၵႃး၊ ပဵၼ်ဢၼ်ယူပ်ႈယွမ်းၵႂႃႇလွႆးလွႆးယူႇယဝ်ႉ။

ၵွပ်ႈၼႆ-တပ်ႉၸုမ်း (2) လႄႈ တပ်ႉၸုမ်း (5) ၵႂႃႇၶဝ်ႈၸူး (မၼဝ) သေ၊ ႁဵတ်းၵႃႇၵွႆႇယေး၊ ၵႃႉၶၢႆတေႃႇမိူင်းထႆးယူႇယဝ်ႉ။

မိူၼ်ၼင်ႇ တပ်ႉၸုမ်း(3)  ၸဝ်ႈၵွၼ်းၸိူင်းၶဝ်ၼႆၵေႃႈ မိူဝ်ႈပီ-1968 ၼၼ်ႉ ၶိုၼ်ႈၵႂႃႇႁူမ်ႈႁွမ်းၸဝ်ႈၼွႆႉသေ၊ ပူၵ်းတင်ႈမႃး

 တပ်ႉၽွမ်ႉႁူမ်ႈ လုၵ်ႉၽိုၼ်ႉၸိုင်ႈတႆး (S. U. R. A ) ၼၼ်ႉယူႇယဝ်ႉ။

  ဢၼ်ပဵၼ် ၸုမ်း(1) ၵေႃႈ တပ်ႉၵွင် (6) ၶႂၢၼ်တွင်း ၶဝ်ၵႂႃႇပွင်း (K. I. A) သေၽၢတ်ႇဢွၵ်ႇၽၢႆႇတႂ်ႈတပ်ႉၸုမ်း (1) ယဝ်ႉ။

တပ်ႉၵွင်မၢႆ (5) ၶုၼ်လီ၊ ၶုၼ်းဢေး ပူတ်းပႅတ်ႈ ၸၢႆးပၢၼ်မႂ်ႇသေ ၵႂႃႇႁူမ်ႈႁွမ်း ၶႄႇၽိူၵ်ႇ၊ ၽၢတ်ႇဢွၵ်ႇၽၢႆႇတႂ်ႈတပ်ႉၸုမ်း (1)

ယဝ်ႉ၊ ဝၢႆးလိုၼ်းမႃးတပ်ႉၵွင် (5) တပ်ႉၵွင်(6)  တပ်ႉၵွင်(4) ဢမ်ႇထုၵ်ႇၵၼ်လႄႈ ထိုင်တီႈ လႆႈတိုၵ်းၵၼ်မႃးယူႇယဝ်ႉ။

      တပ်ႉသိုၵ်း ၸိုင်ႈတႆးတႆႉ ဢၼ်ပဵၼ် ၸိူဝ်ႉၽၼ်းမၼ်း ၵိုတ်းယူႇ တပ်ႉၸုမ်း (4) ၵူၼ်း၊ ဢမ်ႇတႅၵ်ႇဢမ်ႇယၢႆႈၵၼ်လႄႈ ထိုင်မႃးပီ-1969

ၼၼ်ႉ တပ်ႉၵွင်မၢႆ (4) လႄႈတပ်ႉၸုမ်း (4) ၸွင်ႇမႃး ႁူမ်ႈႁွမ်းၵၼ်သေ ၽွတ်ႈႁႅၼ်းတပ်ႉတိူင်းမၢႆ (1) ဢၼ်ၸဝ်ႈသိူဝ်ဝၢႆႇ ဢွၼ်ႁူဝ်ၼၼ်ႉယူႇယဝ်ႉ။

 ထိုင်မႃးပီ-1970 ၼီႈၼၼ်ႉ ၼႂ်းတိူင်းမၢႆ (1) ၼႆႉၽိတ်းမေႃးၵၼ်ႁၢဝ်ႉႁႅင်း ဢမ်ႇၵႄႈလိတ်ႈလႆႈ။ သိူဝ်လႄႈ၊ ပူဝ်ႇထုၼ်းလ၊ ၸၢႆးၼၼ်ႇတႃႇၶဝ်ၵူၼ်းပွင်း (60) ပၢႆ

ၵႂႃႇဝၢင်းၶိူင်ႈ ၶဝ်ႈလႅင်းၸူးမၢၼ်ႈသေ တပ်ႉတၢင်းသဵင်ႈ (300) ပၢႆၼၼ်ႉ ထၢတ်ႈၸႂ်တူၵ်းလႄႈ ယွၼ်းၵိုတ်းပေႃးသိုၵ်းၵႂႃႇယူႇယဝ်ႉ။ မိူဝ်ႈၽွင်းယၢမ်းၼၼ်ႉ တပ်ႉတိူင်းမၢႆ (1)

ၼႆႉ ၵိုတ်းၵူၼ်း (100) ပၢႆလႄႈႁႅင်းသိုၵ်းမီး (30) ပၢႆၵူၺ်းယူႇယဝ်ႉ။

 တီႈမိူင်းတႆး ပွတ်းၸၢၼ်းၼႆႉၵေႃႈ မိူဝ်ႈပီ-1964 ၼီႈၼၼ်ႉ ၸဝ်ႈႁၢၼ်၊ သၢင်ႇသေႃး ဢွၼ်ႁူဝ် ၵေႃႇၶမ်း၊ သိူဝ်ၼွင်၊ သိူဝ်ဢွၼ်ႇၶဝ် ဢွၼ်ဢၼ်သိမ်း ဢႃႇၼႃႇ ၸဝ်ႈၼွႆႉ တပ်ႉၼုမ်ႇသိုၵ်းႁၼ်ယဝ်ႉ၊ ပူၵ်းတင်ႈမႃး- "တပ်ႉသိုၵ်းၶိူဝ်းတႆးၵွၼ်းၶေႃ" ၼၼ်ႉယူႇယဝ်ႉ ။  ၼႂ်းတပ်ႉသိုၵ်း ၶိူဝ်းတႆးၵွၼ်းၶေႃ ၼၼ်ႉ၊ ၵူဝ်သဵၼ်ႈတၢင်းပိူင်ႈၵၼ် ၶဝ်ပဵၼ်ၽၢႆႇသၢႆႉယူႇသေတ ၵေႃႈ ၵွပ်ႈဝႃႈၶဝ်မီးတၢင်းႁၼ် ၵၢၼ်ပၢႆးသိုၵ်း လၢႆလၢႆၵူၺ်းလႄႈ လႆႈၶၢမ်ႇတၢင်း ၸဝ်ႈၵွၼ်းၸိူင်း ပူတ်းၵွင်ႈၵၢင်ႇၶဝ် တီႈဝၢၼ်ႈတူင်ႈ ၵၢင်မိူင်း ယဝ်ႉၵေႃႈ တိၺွပ်း ၵူၼ်းလူင်ၶဝ် (14)  ၵေႃႉသႂ်ႇၶွၵ်ႈပႅတ်ႈသေ၊ ဢၼ်ၵိုတ်းၵမ်ႈၽွင်ႈၼၼ်ႉ ၵႂႃႇၶဝ်ႈၸူး မၢၼ်ႈ (မၼဝ) ႁဵတ်းၵႃႇၵွႆႇယေး မိူင်းၼၢႆး မိူဝ်ႈပီ_ 1966 ၼၼ်ႉယူႇယဝ်ႉ။

 ၵွပ်ႈၼႆလႄႈတီႈမိူင်းတႆး ပွတ်းၸၢၼ်း ၼၼ်ႉၵေႃႈ မီးဝႆႉၸုမ်း ၵွၼ်းၸိူင်း တပ်ႉသိုၵ်း ၽွမ်ႉႁူမ်ႈ လုၵ်ႉၽိုၼ်ႉ (S. U. R. A ) ၶဝ်ၵူၺ်းယူႇယဝ်ႉ၊ မိူင်းတႆးပွတ်းႁွင်ႇၵေႃႈ ၵိုတ်းတပ်ႉသိုၵ်း ၸိုင်ႈတႆး (S. S. A ) တပ်ႉတိူင်းမၢႆ (1) ၵူၺ်းယဝ်ႉ။ တၢင်းၵဵင်းတုင် ဢၼ်ပဵၼ်ၶုၼ်မိၼ်ႉၶဝ်ၵေႃႈမိးဝႆႉႁင်ၶေႃၶဝ်။  ၸုမ်းပႅတ်ႇၵၢင်ႉၵေႃႈ မီးဝႆႉႁၢင်းၶေႃၶဝ်၊ လိူဝ်သေ သွင်ၸုမ်းၼႆႉ လုလႅဝ်ႁၢႆလၢႆၵႂႃႇမူတ်းယဝ်ႉ လႄႈ ၸင်ႇလႆႈႁၼ်ထိုင်ဝႃႈ ၽွင်းလၢႆးလိုၵ်ႉၽိုၼ်ႉၸိုင်ႈတႆး ႁႅင်းလဵၵ်ႉတႄႉတႄႉယူႇယဝ်ႉ။

သိုပ်ႇဢၢၼ်ႇ လွင်ႈၽွမ်ႉႁူမ်ႈတႆး