လၢတ်ႈလူၺ်ႈလွင်ႈ ဝဵင်းႁူဝ်မႃႉ မိူဝ်ႈပၢၼ်ၵဝ်ႇၵွၼ်ႇဢမ်ႇၼၼ်ပၢင်ႇႁူဝ်မႃႉ ယၢမ်းမိူဝ်ႈလဵဝ်

 

လၢတ်ႈလူၺ်ႈလွင်ႈ ပၢင်ႇႁူဝ်မႃႉ ယၢမ်းလဵဝ် ဢမ်ႇၼၼ် ဝဵင်းႁူဝ်မႃႉ မိူဝ်ႈပၢၼ်ၵဝ်ႇၵွၼ်ႇ ပူၼ်ႉမႃးၼၼ်ႉယၢမ်ႈပဵၼ်ဝဵင်းၵူၼ်းၵိုၼ်းငိုၼ်းၶွၼ်ႈမႃးဝႆႉယူႇဝႃႈၼႆ၊ မိူဝ်ႈႁဝ်းတိုၵ်ႉၵေႃႉလဵၵ်ႉၼၼ်ႉတီႈႁူဝ်မႃႉၼႆႉပဵၼ်ထိူၼ်ႇလူင်ဝႆႉယူႇ ၊ ၵူၺ်းၵႃႈမိူဝ်ႈလဵဝ်တႄႉပဵၼ်ပၢင်ႇႁႆႈၵူၼ်ဝၢၼ်ႈၶဝ်ၵႂႃႇမူတ်းယဝ်ႉ။

ႁၢင်ႈဝဵင်းၵဝ်ႇႁူဝ်မႃႉမိူဝ်ႈၵွၼ်ႇ ယၢမ်းလဵဝ်ပဵၼ်တိူၵ်ႇႁႆႈလွၵ်းၼႃး

ယၢမ်ႈလႆႈငိၼ်းၵူၼ်းထဝ်ႈၶဝ်ၶႆႈၼေဝႃႈ မိူဝ်ႈၽွင်းဝဵင်းႁူဝ်မႃႉၼႆႉတိုၵ်ႉမီးယူႇၼၼ်ႉ ၵူၼ်းၵိုၼ်းငိုၼ်းၶွၼ်ႈတေႉတေႉၼႆယူႇ ၶုၼ်ဢုပ်ႉပိူင်ႇဝၢၼ်ႈမိူင်းၵေႃႈပဵၼ်လီလႄႈ ဝဵင်ႁူဝ်မႃႉၼႆႉပဵၼ်ဝဵင်းဢၼ်ၶိုၼ်ႈယႂ်ႇဝဵင်းၼိုင်ႈဝႃႈၼႆယဝ်ႉ

ၵွပ်ႈပဵၼ်ဝဵင်းဢၼ်ၶိုၼ်ႈယႂ်ႇၵူၼ်းၵိုၼ်းငိုၼ်းၶွၼ်ႈၼမ်လႄႈ ပဵၼ်တီႈဢဵဝ်ႇလႄႇၶွင်ၶုၼ်တၢင်ႇဝၢၼ်ႈတၢင်ႇမိူင်းၶဝ်သေမဝ်ႇၵႃးၵူၼ်းၵႃႉၵူၼ်းၵူးၵႃႈၶွၼ်ႈၼမ်ဝႃႈၼႆယဝ်ႉ။

ဢွင်ႈတီႈဝဵင်းၵဝ်ႇႁူဝ်မႃႉၼႆႉမီးဝႆႉယူႇၽၢႆႇႁွင်ႇဝၢၼ်ႈပုင်ႇဝူဝ်းလႄႈ ဝၢၼ်ႈလိူဝ်ႇလွႆ ၊ ၽၢႆႇဢွၵ်ႇသမ်ႉမီးဝၢၼ်ႈၼႃးပုင်ႇ ဝၢၼ်ႈၼႃးႁဵဝ် းလႄႈ ဝၢၼ်ႈၶႆႉ ၊ ၽၢႆၸၢၼ်းဝၢၼ်ႈ မီးဝၢၼ်ႈၼမ်ႉသွမ်ႇ ဝၢၼ်ႈႁုင်းလၢႆး ေၸႊဝဵင်းၵျွၵ်ႉမေး မိူင်းတႆးပွတ်းႁွင်ႇ

ႁုၼ်ႈႁၢင်ႈၽြႃးၵဝ်ႇတီႈႁူဝ်မႃႉ

မိူဝ်ႈၽွင်းဝဵင်းႁူဝ်မႃႉၼႆႉတိုၵ်ႉပဵၼ်ဝဵင်းလူင်ၵူၼ်းၵိုၼ်းငိုၼ်းၶွၼ်ႈယူႇၼၼ်ႉ မီးၶုၼ်လၢႆမိူင်းလၢႆၸဝ်ႈၶႂ်ႈတိုၵ်းသိမ်းဢဝ်ႁဵတ်းႁိုဝ်ၵေႃႈဢမ်ႇလႆႈလႃးလႃး ၵွပ်ႈဝႃႈၶုၼ်ဢၼ်ဢုပ်ႉပိူင်ႇၽွင်းငမ်းဝဵင်းႁူဝ်မႃႉမိူဝ်ႈပၢၼ်ၼၼ်ႉပဵၼ်ၵူၼ်းလီသေမဝ်ႇၵႃး ၼႂ်းဝဵင်းလူင်ႁူဝ်မႃႉၼႆႉ မီးဝႆႉၶူၵ်ႉတမ်ၶဝ်ႈ ၶူၵ်ႉမွင်း လုၵ်ႈၼိုင်ႈ ၶူၵ်ႉမွင်းဢၼ်ၼႆႉတမ်ၶဝ်ႈမိူဝ်ႈလႂ်ၵေႃႈသဵင်တမ်မၼ်းတေယွၼ်ႈမိူဝ်းထိုင်မိူင်းၽီၼႆယဝ်ႉ

လိူဝ်သေမီးၶူၵ်ႉမွင်းယဝ်ႉ သမ်ႉမီးၵႆႇပၢၼ်ႇၶၢဝ်တူဝ်ၼိုင်ႈ ၵႆႇပၢၼ်ၶၢဝ်တူဝ်ၼႆႉသင်ဝႃႈမၼ်းၶၼ်ၼႆသဵင်ၶၼ်မၼ်းၼၼ်ႉယွၼ်ႈမိူဝ်းထိုင်မိူင်းၽီမိူၼ်ၵၼ်ဝႃႈၼႆယဝ်ႉ ၊ မၢႆတွင်း လွင်ႈၼႆႉၶႃႈႁဝ်းဢမ်ႇလႆႈထႅင်ႈမီႇထႅင်ႈၵျီးသင်ၶႃႈ ၵူၼ်းထဝ်ႈၶဝ်လၢတ်ႈၶႆႈၼေဝႆႉၸိူင်ႉႁိုဝ်ၵေႃႈၶႃႈႁဝ်းၶိုၼ်းလၢတ်ႈၶႆႈၼေၵႂႃႇၸိူင်ႉၼၼ်ၵူၺ်း။

ႁုၼ်ႈႁၢင်ႈၽြႃးၵဝ်ႇတီႈႁူဝ်မႃႉ

ၵွပ်ႈဝႃႈသဵင်ၶူၵ်ႉ သဵင်ၵႆႇၶၼ်ၼၼ်ႉယွၼ်ႈထိုင်မိူင်းၽီယူႇၵူႈဝၼ်းလႄႈၶုၼ်ၽီၶဝ်ၸင်ႇပႂ်ႉပႃးပၼ် တူၺ်းလွမ်ပၼ်ဝဵင်းႁူဝ်မႃႉၼႆႉယႃႇႁႂ်ႈလႆႈထူပ်းၽေးသိုၵ်းၽေးသိူဝ်ၼႆသေ ၽႂ်မိူဝ်းတိုၵ်းၵေႃႈဢမ်ႇပေႉလႆႈသေပွၵ်ႈ ၸဝ်ႈလႂ်ၶုၼ်လႂ်ဢၼ်ၶႂ်ႈတိုၵ်းၶႂ်ႈသိမ်းဢဝ်ဝဵင်းႁူဝ်မႃႉၼႆႉၸႂ်ႉႁႅင်းသိုၵ်းၼမ်တၢၼ်ႇလႂ်ၵေႃႈဢမ်ႇတိုၵ်းပေႉလႆႈသေမဝ်ႇၵႃးႁဵတ်းႁႂ်ႈလူႉသုမ်းၵူၼ်းတၢင်းၼမ်တၢင်းလၢႆၼႆယဝ်ႉ။

ႁုၼ်ႈႁၢင်ႈၽြႃးၵဝ်ႇတီႈႁူဝ်မႃႉ

မိူဝ်ႈဢွၼ်ၼႃႈသိုၵ်းၵမ်ႇၽႃႇပႆႈပဵၼ်ၼၼ်ႉမီးၵႃးလႃးၼႃႈၽိူၵ်ႈမိူင်းဝၼ်းတူၵ်းၶဝ်ပွမ်တူဝ်ႁဵတ်းမေႃလူတူၺ်းပေႇတၢင်ႇၵႃႇလႃးမိူဝ်းဢႅဝ်ႇယဵမ်ႈတူၺ်းၼႂ်းဝဵင်းသေလၢတ်ႈၼေၵူၼ်းမိူင်းဝႃႈ ၼႂ်းဝဵင်းႁူဝ်မႃႉၼႆႉဢမ်ႇႁိုင်သင်တေၸၢင်ႈထူပ်းၽေး ၼင်ႇႁိုဝ်တေဢမ်ႇၸၢင်ႈထူပ်းၼၼ်ႉလူဝ်ႁႃလၢႆးမၼ်းဝႆႉယဝ်ႉဝႃႈၼႆယဝ်ႉ။

လွင်ႈၼႆႉလႆႈႁူႉထိုင်ၸဝ်ၶုၼ်ၽွင်းငမ်းဝၢၼ်ႈမိူင်းသေ ၸိူဝ်းပဵၼ်ၸုမ်းလူပေႇတၢင်ႇၵႃႇလႃးၼၼ်ႉၸင်ယွၼ်းၶႂၢင်ႉတီႈၶုၼ်ၽွင်းငမ်းဝၢၼ်ႈမိူင်းသေ ၼင်ႁိုဝ်ဝဵင်းႁူဝ်မႃႉတေလွတ်ႈၽေးၼၼ်ႉ ၶဝ်ၸင်ႇယွၼ်းႁဵတ်းႁုၼ်ႇႁၢင်ႈၶုၼ်ၽီလူင်ဝႆႉတီႈၼႃႈထမ်ႈဢၼ်မီးၼႃႈၽႃပၢၼ်းတၢပ်ႈ ၽၢႆႇဢွၵ်ႇဝၢၼ်ႈၼႃးႁဵဝ်းၼၼ်ႉသေဢဝ်မိုဝ်းၸီႉၶဝ်ႈၵႃႇၼႂ်းၵၢင်ဝဵင်းႁူဝ်မႃႉၼၼ်ႉဝႆႉဝႃႈၼႆယဝ်ႉ။

လွင်ႈဢၼ်ၶဝ်ႁဵတ်းႁုၼ်ႇႁၢင်ႈၶုၼ်ၽီသေၸီႉၶဝ်ႈၼႂ်းဝဵင်းၼၼ်ႉၶဝ်တၢင်ႇလဝ်ႈလၢတ်ႈၼေၶုၼ်မိူင်းႁူဝ်မႃႉဝႃႈ ႁႂ်ႈဝဵင်းႁူဝ်မႃႉလွတ်ႈၽေး ႁႂ်ႈဝဵင်းႁူဝ်မႃႉၶိုၼ်ႈယႂ်ႇ ႁႂ်ႈၵူၼ်းမိူင်းမီးတၢင်းသိူဝ်း ႁႂ်ႈၶုၼ်ဢုပ်ႉပိူင်ႇသဵင်းႁူဝ်မႃႉဢသၢၵ်ႈယၢဝ်းယိုၼ်းဝႃႈၼႆပဵၼ်ပွႆးလူင်ၵိုၼ်းဝႆႉဢိုၵ်ႉဢိုၵ်ႉၼႆယဝ်ႉ။

ၵူၺ်းၵႃႈမိူဝ်ႈႁဵတ်းႁုၼ်ႇႁၢင်ႈၶုၼ်ၽီလူင်ၼၼ်ႉသေသႂၢင်းၸႂ်မၼ်းၼၼ်ႉ ၶဝ်ဢမ်ႇပၼ်ၽႂ်ၶဝ်ႈၸမ်လိူဝ်သေၵူၼ်းၸုမ်းၶဝ် ၵႂၢမ်းႁေႃးဢၼ်ၶဝ်သႂၢင်းၸႂ်ႁုၼ်ႇႁၢင်ႈၶုၼ်ၽီၼၼ်ႉ ၶဝ်ႁေႃးပဵၼ်ၵႂၢမ်းၶဝ်လႄႈၵူၼ်းၵမ်ႈၼမ်ဢမ်ႇမီးၽႂ်ႁူႉပွင်ႇၸႂ် ၵူၼ်းၸိူဝ်းႁူႉၵေႃႉဢိတ်းၵေႃႉဢွတ်းသေလႆႈငိၼ်းတႄႉဝႃႈၵႂၢမ်းဢၼ်ၶဝ်ႁေႃးၼၼ်ႉပဵၼ်ၵႂၢမ်းဢမ်ႇလီလၢႆလၢႆၼႆၵေႃႈဝႃႈၼႆယဝ်ႉ။