မိူင်းတႆး ပဵၼ်သႅင်ဢေ တႃႇၶႄႇတႃၽီႇ တေၶိုၼ်ႈပဵၼ်ၸဝ်ႈမႁႃႇဢမ်းၼၢတ်ႈ

မိူင်းတႆး ပဵၼ်သႅင်ဢေ တႃႇၶႄႇတႃၽီႇ တေၶိုၼ်ႈပဵၼ်ၸဝ်ႈမႁႃႇဢမ်းၼၢတ်ႈ

လူင်ပွင်ၸိုင်ႈၶႄႇ တိုၼ်းႁူႉႁၼ် တႅၵ်ႇလႅင်းလီ တီႈၼႂ်းၸႂ်ဝႃႈ "တႃႇတေၶိုၼ်ႈပဵၼ် ၸဝ်ႈမႁႃႇဢမ်းၼၢတ်ႈ ၼႂ်းၵမ်ႇၽႃႇလႆႈၼႆႉ လူဝ်ႇလႆႈမီး ဢဵၼ်ႁႅင်း ၵုမ်းၵမ်လႆႈ ၼႂ်းၼႃႈၼမ်ႉ သမ်ႇမုတ်ႉတရႃႇ တင်းမူတ်းၵွၼ်ႇ ၸင်ႇတေပဵၼ်လႆႈ" ၼႆၼၼ်ႉယူႇ။

ဢၼ်ၵူၼ်းၶိူဝ်း ဢမေႇရိၵၢၼ်ႇၶဝ် ပဵၼ်ၸဝ်ႈမႁႃႇဢမ်းၼၢတ်ႈမႃး ပီယၢဝ်းၶၢဝ်းႁိုင်ၼၼ်ႉၵေႃႈ ၵွပ်ႈၶဝ်ၵုမ်းၵမ်လႆႈ ပိုၼ်ႉတီႈၼႃႈၼမ်ႉ သမ်ႇမုတ်ႉတရႃႇ ၼႂ်းၵမ်ႇၽႃႇတင်းမူတ်း ၼၼ်ႉယဝ်ႉ။ ပေႃးၸိူင်ႉၼၼ် သင်ၶႂ်ႈၶိုၼ်ႈပဵၼ် ၸဝ်ႈမႁႃႇဢမ်းၼၢတ်ႈၵေႃႈ ႁူႉၵႃႈတေလႆႈသၢင်ႈဢဵၼ်ႁႅင်း ၼႂ်းၼႃႈၼမ်ႉ သမ်ႇမုတ်ႉတရႃႇ ၼႂ်းၵမ်ႇၽႃႇတင်းမူတ်းၵွၼ်ႇ ၸင်ႇတေပဵၼ်မႃး ၼင်ႇၵၢင်ၸႂ် ႁဝ်းၶႂ်ႈပဵၼ် ၼႆ ၶႄႇတိုၼ်းႁူႉၸႅင်ႈလႅင်းလီ။

ယွၼ်ႉၼၼ်လႄႈ ၼႃႈၼမ်ႉပၢင်ႇလၢႆႇၶႄႇပွတ်းၸၢၼ်းၼႆႉ ပဵၼ်ပိုၼ်ႉတီႈ လမ်ႇလွင်ႈ တႃႇလူင်ပွင်ၸိုင်ႈၶႄႇ တႄႉတႄႉဝႃႈဝႃႈ။ တႃႇႁႄႉၵင်ႈ ယႃႇႁႂ်ႈၽူႈၶဵၼ် ၶဝ်ႈလေႃႇတိုၵ်းလႆႈငၢႆႈငၢႆႈၵေႃႈ ပဵၼ်ပၢင်ႇလၢႆႇ ပွတ်းၸၢၼ်း။ တႃႇတေႃႉဢဝ် ၵုၼ်ႇၵႃႉ တၢင်းၶၢႆၶႄႇ ဢွၵ်ႇၵႂႃႇ ၼႂ်းမိူင်းဝၼ်းတူၵ်းၵေႃႈ ပဵၼ်ၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်း မိူၼ်ၵၼ်။ ထႅင်ႈၽၢႆႇၼိုင်ႈတၢင်းၼိုင်ႈသမ်ႉ ၶူဝ်းၶွင်သၽႃႇဝ ဢၼ်မီးဝႆႉ တႂ်ႈပိုၼ်ႉၼမ်ႉပၢင်ႇလၢႆႇၶႄႇ ပွတ်းၸၢၼ်းၼႆႉ မီးဝႆႉထႅင်ႈၼမ်လၢႆ။

ၵွပ်ႈၼႆလႄႈ လူင်ပွင်ၸိုင်ႈၶႄႇ ၸင်ႇဢဝ်တႃပၵ်းၸပ်းဝႆႉ ၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်း လႄႈ လူင်းတိုၼ်းလၢင်း သၢင်ႈၵုၼ်ပွမ်၊ သၢင်ႈတႃႈႁိူဝ်းမိၼ်၊ တႃႈႁိူဝ်းၼိူဝ်ၼမ်ႉ၊ သၢင်ႈတပ်ႉငဝ်ႈငုၼ်း ႁိူဝ်းလမ်ၼမ်ႉဝႆႉ ယႂ်ႇယႂ်ႇလူင်လူင် ၵူၺ်းဢမ်ႇၵႃး ဢဝ်မၢၵ်ႇလူင် မိတ်ႉသၢႆး၊ ၼိဝ်ႇၶရီးယႃး မႃးဝၢင်းတမ်းဝႆႉ သမ်ႉပေႃးမၢၵ်ႇမိူဝ်မိူင်းလူင်ဝႆႉယဝ်ႉ။

လွင်ႈဢၼ် လူင်ပွင်ၸိုင်ႈၶႄႇ ၶႂ်ႈဢဝ်ၼႃႈၼမ်ႉ ပၢင်ႇလၢႆႇၶႄႇ ပွတ်းၸၢၼ်း ယူႇၽၢႆႇတႂ်ႈၵၢၼ်ဢုပ်ႉပိူင်ႇ လူင်ပွင်ၸိုင်ႈၶႄႇၼၼ်ႉ-

1. တႃႇသၢင်ႈတပ်ႉၼမ်ႉ ဢၼ်ယႂ်ႇလူင် တႃႇႁႄႉၵင်ႈၶဵၼ် မိူင်းဝၼ်းတူၵ်း လႄႈ ၸုမ်းဢူၺ်းလီ ဢမေႇရိၵၢၼ်ႇ။

2. တႃႇမႃးပၵ်းတႃ ပႂ်ႉတူၺ်း လႄႈ လွၵ်ႇငိုတ်ႈ လွင်ႈတူင်ႉၼိုင် ဢမေႇရိၵၢၼ်ႇ - ထၢႆႇဝၼ်ႇ။

3. တႃႇသၢင်ႈတႃႈႁိူဝ်း သူင်ႇၵုၼ်ႇၵႃႉတၢင်းၶၢႆ တႃႇသူင်ႇဢွၵ်ႇ ၼႂ်းၵုၼ်ယူးရူပ်ႉတင်းမူတ်း။

4. တႃႇပဵၼ်ၸဝ်ႈၶွင် ၶူဝ်းသၽႃႇဝ တႂ်ႈပိုၼ်ႉၼမ်ႉပၢင်ႇလၢႆႇၶႄႇ ပွတ်းၸၢၼ်း လႄႈ တႃႇလႆႈၵဵပ်းၶွၼ်ႇ ႁိူဝ်းတၢင်ႇၵုၼ်ႇ ဢၼ်လတ်းၽၢၼ်ႇၶဝ်ႈမႃး ၼႂ်းၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်း။

ၵပ်းၵၢႆႇလူၺ်ႈလွင်ႈၼႆႉသေ လူင်ပွင်ၸိုင်ႈ ဢမေႇရိၵၢၼ်ႇ ၵေႃႈ ဢၢင်ႈဝႃႈ ၵွပ်ႈဢမေႇရိၵၢၼ်ႇ ပဵၼ်ၸဝ်ႈမႁႃႇဢမ်းၼၢတ်ႈ ၼိူဝ်ၵမ်ႇၽႃႇဝႆႉလႄႈ လွင်ႈၼႆႉ လူင်ပွင်ၸိုင်ႈ ဢမေႇရိၵၢၼ်ႇ မီးပုၼ်ႈၽွၼ်း တေလႆႈၵႅတ်ႇၶႄ ပႂ်ႉပႃး ပုၼ်ႈတႃႇၸိုင်ႈမိူင်း ၸိူဝ်းဢၼ်ယူႇႁိမ်းႁွမ်း မိူၼ်ၼင်ႇ ၵျႃႇပၢၼ်ႇ၊ ၵူဝ်းရီးယႃးၸၢၼ်း၊ ဝႅတ်ႉၼမ်း၊ ၾိလိပ်ႉပိၼ်း၊ ဢိၼ်ႇၻူဝ်ႇၼီးသျႃး၊ မလေးသျႃး လႄႈ ထၢႆႇဝၼ်ႇ ၸိူဝ်းၼႆႉ မိူၼ်ၵၼ်ဝႃႈၼႆသေ ဢွၼ်ဢဝ် ၸုမ်းဢူၺ်းလီမၼ်း သူင်ႇတပ်ႉၼမ်ႉ ၶဝ်ႈမႃးပၵ်းဝႆႉ ၼႂ်းၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်းဝႆႉယူႇယဝ်ႉ။

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ ဢမေႇရိၵၢၼ်ႇ ဢွၵ်ႇမႃးပိုၼ်ၽၢဝ်ႇလၢတ်ႈဝႃႈ သင်လူင်ပွင်ၸိုင်ႈၶႄႇလႅင် ၶဝ်ႈႁုပ်ႈယိုတ်း ၵုၼ်ထႆႇဝၼ်ႇ မိူဝ်ႈလႂ် ဢမေႇရိၵၢၼ်ႇႁဝ်း တူဝ်ႈတၼ်း တႃႇတေၸွႆႈထႅမ် လႄႈ ၵႅတ်ႇၶႄပၼ် ၵုၼ်ထႆႇဝၼ်ႇတႃႇသေႇ ၸွမ်းၼင်ႇမူႇပိူင်ၸိုင်ႈမိူင်းႁဝ်း မီးဝႆႉ ဝႃႈၼႆယဝ်ႉ။

ၸိူင်ႉႁိုဝ်ၵေႃႈယဝ်ႉ ၽၢႆႇလူင်ပွင်ၸိုင်ႈၶႄႇတေႉ ၸိူင်ႉၼင်ႇမၼ်းလႆႈဝၢင်းၽႅၼ်ဝႆႉၼၼ်ႉ တိုၼ်းတေသိုပ်ႇၽေႃႇၼမ်ႉ ၽေႃႇတူဝ်ၵႂႃႇ ႁႂ်ႈလႆႈပဵၼ်မႃး ၼင်ႇၶူင်းၵၢၼ်မၼ်း လႆႈဝၢင်ႈၽႅၼ်ဝႆႉၼၼ်ႉ တိၵ်းတိၵ်းယဝ်ႉ။

သဵၼ်ႈတၢင်း တႃႇၶဝ်ႈထိုင် ၼႂ်းၼႃႈၼမ်ႉသမ်ႇမုတ်ႉတရႃႇၼႆႉ ၶႄႇဝၢင်းၽႅၼ်ဝႆႉ သွင်သဵၼ်ႈ

#သဵၼ်ႈတၢင်းထီႉၼိုင်ႈ

တႄႇတီႈ မိူင်းၶႂၢၼ်ၸူဝ်ႊ - ၵႂၢၼ်ၸူဝ်ႊ - ၵုၼ်ႁၢႆၼၼ် - ၵုၼ်ပွမ် - ၵမ်ႇပူးၶျႃး - (1) တတ်းလိၼ်မိူင်းထႆး - (2) မလေးသျႃး - သိင်ႇၵႃႇပူဝ်ႊ - ၸိတ်ႉတူၺ်ႇ (ရၶႅင်ႇ) - ၿၢင်းၵလႃးတဵသ်ႉ - သီရိလင်းၵႃ - မိူင်းပႃၵိသ်ႉသတၢၼ်ႇ - ဢီႇရၢၼ်ႇ။

သင်ႁဝ်းၵႂႃႇတူၺ်း ၼႂ်းၶႅပ်းႁၢင်ႈၽႅၼ်ႇလိၼ် ၼၼ်ႉၼႆ တေလႆႈႁၼ် မဵတ်ႉသီလႅင်လႅင် တမ်းဝၢင်းဝႆႉ ပဵၼ်တီႈ ပဵၼ်တီႈဝႆႉယဝ်ႉ။ ဢွင်ႈတီႈ ဢၼ်မီးမဵတ်ႉသီလႅင်လႅင် တမ်းဝၢင်းဝႆႉၼၼ်ႉ ပဵၼ်တႃႈႁိူဝ်း ၵုၼ်ႇၵႃႇတၢင်းၶၢႆ ဢၼ်တေမႃးၵိုတ်းလိုဝ်ႈ လႄႈ ဝၢင်း/တၢင်ႇ ၵုၼ်ႇၵႃႉတၢင်းၶၢႆ လဝ်းပၢၼ်းၶႄႇ၊ ထႅင်ႈပိူင်ၼိုင်ႈသမ်ႉ ပဵၼ်ဢွင်ႈတီႈပၵ်းတပ်ႉသိုၵ်းၶႄႇ တႃႇဢဝ်ႁူမ်ႇလူမ်ႈ ႁိူဝ်းလဝ်းပၢၼ်းၶႄႇၶဝ်ယဝ်ႉ။

#သဵၼ်ႈတၢင်းထီႉသွင်

တႄႇတီႈ မိူင်းၶုၺ်ႊမိင်ႊ မိူင်းၶႄႇ လတ်းၽၢၼ်ႇလူင်းမႃး ၼႂ်းမိူင်းတႆး ၶဝ်ႈႁႃ မၼ်းတလေး၊ ၼေႇပျီႇတေႃႇ၊ ယၢၼ်ႇၵုင်ႇ၊ ၸိတ်ႇတူၺ်ႇ၊ ၿၢင်းၵလႃးတဵသ်ႉ၊ သီရိလင်းၵႃ၊ မိူင်းပႃၵိသ်သတၢၼ်ႇ၊ ဢီႇရၢၼ်ႇ၊ ဢူဝ်ႇမၼ်ႇ၊ ယီႇမိၼ်ႇ လူင်းထိုင် ၵုၼ်ဝၼ်းတူၵ်းယူႇယဝ်ႉ။

သဵၼ်ႈတၢင်းထီႉသွင်ၼႆႉၵေႃႈ လူင်ပွင်ၸိုင်ႈၶႄႇ ဝႆႉလမ်ႇလွင်ႈ ၼၵ်းၼႃ မိူၼ်ၵၼ် တင်း ၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်းယဝ်ႉ။ ၵွပ်ႈဝႃႈ သဵၼ်ႈတၢင်း သဵၼ်ႈထီႉသွင်ၼႆႉ မၼ်းပဵၼ်သဵၼ်ႈတၢင်းလတ်း ပုၼ်ႈတႃႇလူင်ပွင်ၸိုင်ႈၶႄႇ တေၶဝ်ႈထိုင်လႆႈ ၼႂ်းၼႃႈၼမ်ႉသမ်ႇမုတ်ႉတရႃႇ ဢိၼ်ႇတိယ ၼၼ်ႉယဝ်ႉ။

ၵွပ်ႈၼႆလႄႈ မိူင်းတႆး မိူင်းမၢၼ်ႈၼႆႉ ပဵၼ်သႅင်ဢေ ပုၼ်ႈတႃႇၶႄႇ၊ တႃႇႁႂ်ႈၶႄႇ တေပဵၼ်မႃး ၽူႈယိုင်ႈယႂ်ႇသေပိူၼ်ႈ ၼႂ်းၵမ်ႇၽႃႇ လႄႈ ၶိုၼ်ႈပဵၼ် ၸဝ်ႈမႁႃႇဢမ်းၼၢတ်ႈ သဵၼ်ႈၼိုင်ႈ။ တၢင်းသဵၼ်ႈၼႆႉ ၵွပ်ႈၶၢဝ်းတၢင်းမၼ်းပွတ်းလႄႈ ႁဵတ်းႁႂ်ႈၵုၼ်ႇၵႃႉတၢင်းၶၢႆၶႄႇ တေၸဵဝ်းထိုင် ၼႂ်းၼႃႈၼမ်ႉပၢင်ႇလၢႆႇ ၵူၺ်းဢမ်ႇၵႃး တႃႇသၢင်ႈ တၢင်းရူတ်ႉၾႆး၊ တၢင်းၵႃးၼၼ်ႉၵေႃႈ ဢမ်ႇပေႃးလႆႈလူင်းတိုၼ်းလၢင်းၼမ် မိူၼ်ၼႃႈၼမ်ႉ ပၢင်ႇလၢႆႇၶႄႇ ပွတ်းၸၢၼ်း။

ၵူၺ်းၵႃႈ တႃႇလူင်ပွင်ၸိုင်ႈၶႄႇ တေသူင်ႇၵုမ်ႇပၼ်ႇၼီႇၶႄႇ လႄႈ ၵူၼ်းႁဵတ်းၵၢၼ်ၶႄႇ ၶဝ်ႈမႃးၽေႃႇၼမ်ႉ ၽေႃႇတူဝ် ၶူင်းၵၢၼ် သဵၼ်ႈတၢင်းရူတ်ႉၾႆး၊ သဵၼ်ႈတၢင်းၵႃႉၶၢႆ ၼႂ်းၼင်လိၼ် မိူင်းတႆး မိူင်းမၢၼ်ႈၼၼ်ႉ လူင်ပွင်ၸိုင်ႈၶႄႇ တၵ်းတေလႆႈႁဵတ်း ႁႂ်ႈၼႃႈလိၼ် ၸိူဝ်းဢၼ်ၶဝ်တေလတ်းၽၢၼ်ႇ ၵႂႃႇမႃးၼၼ်ႉ မီးလွင်ႈႁူမ်ႇလူမ်ႈ ပုၼ်ႈတႃႇၵူၼ်းၶိူဝ်းၶႄႇၶဝ်ၵွၼ်ႇ ၶဝ်ၸင်ႇတေၶဝ်ႈမႃး။

ၵမ်းၼႆႉ တႃႇတေဢဝ်ႁူမ်ႇလူမ်ႈပၼ် ၸဝ်ႈၵုမ်ႇပၼ်ႇၼီႇၶႄႇ လႄႈ ၵူၼ်းႁဵတ်းၵၢၼ်ၶႄႇၼၼ်ႉ ၶႄႇတိုၼ်းၶဝ်ႈႁႃ ၽူႈမီးဢမ်းၼၢတ်ႈ ၼႂ်းပိုၼ်ႉတီႈလႂ် ပိုၼ်ႉတီႈၼၼ်ႉတႃႇသေႇ။ 

ပိူင်တႅၵ်ႈမၼ်း - မိူၼ်ၼင်ႇ မိူင်းတႆး ပွတ်းႁွင်ႇၼႆႉ ၽူႈမီးဢမ်းၼၢတ်ႈ မၼ်းပဵၼ် လူင်ပွင်ၸိုင်ႈသိုၵ်းမၢၼ်ႈႁ၊ ၸၢဝ်းၶိူဝ်း ယိပ်းၵွင်ႈၵၢင်ႇႁ၊ ၼႂ်းၼႃႈတီႈဢၼ်ၼႆႉလူး ၽႂ်မီးဢမ်းၼၢတ်ႈယိပ်းၵမ် ၼႆသေ ၶဝ်မႃးၸႅၵ်ႇဢွၵ်ႇ ပဵၼ်ၵွင် ပဵၼ်ၸုမ်းယဝ်ႉ ပွႆႇၵူၼ်းၶဝ်ႈႁႃ ၸုမ်းၽူႈမီးဢမ်းၼၢတ်ႈ ၼႂ်းပိုၼ်ႉတီႈၼၼ်ႉ ၵူႈမူႇ ၵူႈၸုမ်းယဝ်ႉ။

ပေႃးပဵၼ် ၼႂ်းၼႃႈတီႈသိုၵ်းမၢၼ်ႈ ၵုမ်းၵမ်ၵေႃႈ ၶဝ်ႈႁႃမၢၼ်ႈ၊ ပေႃးပဵၼ်ၼႃႈတီႈ သိုၵ်းရၶႅင်ႇ ၵုမ်းၵမ်ၵေႃႈ ၶဝ်ႈႁႃသိုၵ်းရၶႅင်ႇ၊ ပေႃးပဵၼ်ၼႃႈတီႈ ဝၢၼ်ႈႁႆးၵေႃႈ ၶဝ်ႈႁႃဝၢၼ်ႈႁႆး၊ ပေႃးပဵၼ်ၼႃႈတီႈ ၵဝ်ႈၵၢင်ႉၵေႃႈ ၶဝ်ႈႁႃၸုမ်းၵဝ်ႈၵၢင်ႉ ႁဵတ်းၼႆသေ ၶတ်းၸႂ်ၶဝ်ႈႁူၺ်း ၵူႈမူႇၵူႈၸုမ်း ပုၼ်ႈတႃႇတေဢဝ်ႁူမ်ႇလူမ်ႈပၼ် ၵုမ်ႇပၼ်ႇၼီႇၶႄႇ လႄႈ ၵူၼ်းႁဵတ်းၵၢၼ်ၶႄႇ။

ၵွပ်ႈသင်လႄႈ ၶႄႇ မႆႈၸႂ်လွင်ႈႁူမ်ႇလူမ်ႈ - ၵွပ်ႈဝႃႈၶႄႇၼႆႉ ႁူမ်ႈဝႃႈမၼ်း ၶဝ်ႈၵႂႃႇၶုတ်းထၢၼ်ႇႁိၼ်၊ ၵႂႃႇၶုတ်းၶမ်း၊ သၢင်ႈၽၢႆ၊ ၽွၵ်ႈတၢင်းရူတ်ႉ တေႇၵႂႃႇ ႁဵတ်းလွင်ႈသင်သေဢမ်ႇဝႃႈ မၼ်းတိုၼ်း ဢမ်ႇတွၼ်ႉၸၢင်ႈၵူၼ်းမိူင်းပိူၼ်ႈ မႃးႁဵတ်းၵၢၼ်ပၼ်ၶဝ်သေပွၵ်ႈ။ ႁဵတ်းတီႈလႂ် မိူင်းလႂ်ဢမ်ႇဝႃႈ မၼ်းတိုၼ်း ဢဝ်ၶူဝ်းၶွင်ၼ်း၊ ၶိူင်ႈၸႂ်ႉတိုဝ်းမၼ်း၊ ၵူၼ်းၶိူဝ်းမၼ်း ၵႂႃႇၸွမ်းၵူႈတီႈ။ ႁူမ်ႈဝႃႈ ၸၢင်ႈၶိုၼ်းပိူၼ်ႈၵေႃႈ ၵမ်ႈၼမ် ပဵၼ်ၵၢၼ် လၢင်ႉထၢင်ၽၢႆႈ၊ သၵ်ႉၽႃႈ၊ သၵ်ႉၶူဝ်း၊ ႁဵတ်းလွင်ႈမူတ်းသႂ်ပၼ် ၵူၼ်းႁဵတ်းၵၢၼ်ၶႄႇၶဝ် မွၵ်ႈၼၼ်ႉၵူၺ်း။

ပေႃးၸိူင်ႉၼၼ် ယႃႇပေဝူၼ်ႉဝႃႈ ပေႃးၶႄႇမႃးၽွၵ်ႈ တၢင်းရူတ်ႉ တၢင်းၵႃးတေႉ ႁဝ်းတေမီးၵၢၼ် မီးငၢၼ်း တေလႆႈသိုဝ်ႉ လႆႈၶၢႆ ဢၼ်ဝႃႈၼၼ်ႉ ယႃႇဝူၼ်ႉလႃးလႃး။ ၶႄႇ ၼႆႉ ၶဝ်ၵူၺ်းၶႂ်ႈၶၢႆၶူဝ်းၶဝ် ပၼ်ပိူၼ်ႈၵူၺ်း၊ ၶူဝ်းပိူၼ်ႈၼၼ်ႉ ၶဝ်ဢမ်ႇၶႂ်ႈသိုဝ်ႉလႃးလႃး၊ (ပေႃးဢမ်ႇလူဝ်ႇၼႃႇ)၊ လိူဝ်သေၼၼ်ႉၵေႃႈ ၶႄႇၼႆႉ မီးၸႂ် မိူၵ်ႈလိူင်း ၼိူဝ်ၵူၼ်းၶိူဝ်း ၼႂ်းပိုၼ်ႉတီႈ၊ မေႃထၢင်ႇလဵၵ်ႉပိူၼ်ႈ၊ ဢမ်ႇသၢင်းၵိၼ် ပၵ်းပိူင်မၢႆမီႈ မိူင်းပိူၼ်ႈ၊ ဢမ်ႇမီးပၵ်းပိူင်၊ ဝူၺ်ႇႁၢင်ႈ လႄႈ ၼမ်ႉၸႂ်တူၵ်းတႅမ်ႇလိူဝ်ပိူၼ်ႈ ၼႂ်းၵမ်ႇၽႃႇ။ ၼမ်ႉၸႂ် ဢၼ်ဝႃႈ မိူဝ်ႈပိူၼ်ႈ မိူဝ်ႈႁဝ်း ၼႆၼၼ်ႉ တိုၼ်းဢမ်ႇမီးလႃးလႃး။ ၵွပ်ႈၼႆလႄႈ ၵူၼ်းၶိူဝ်းၶႄႇ ၵႂႃႇမီးလႂ်ၵေႃႈ လွင်ႈပူၼ်ႉပႅၼ် သုၼ်ႇလႆႈသုၼ်ႇပဵၼ်ၵူၼ်း ၼႂ်းပိုၼ်ႉတီႈၶဝ်ယူႇၼၼ်ႉ တိုၼ်းတေမီးမႃး ဢမ်ႇႁၢင်ႉ။

ၵမ်းၼႆႉ သင်မႃးတူၺ်း တၢင်းယၢမ်ႈ လူင်ပွင်ၸိုင်ႈၶႄႇ ၶဝ်ၵေႃႈ ဝၢၼ်ႈလႂ် မိူင်းလႂ်သေဢမ်ႇဝႃႈ ၽၢႆႇလူင်ပွင်ၸိုင်ႈၵေႃႈ မၼ်းႁဵတ်းၵေႃႉ၊ ၽၢႆႇၸုမ်းၽူႈလုၵ်ႉၽိုၼ်ႉၵေႃႈ မၼ်းႁဵတ်းၵေႃႉ၊ ၼႂ်းၵႄႈ ၸုမ်းလူင်ပွင်ၸိုင်ႈ လႄႈ ၽူႈလုၵ်ႉၽိုၼ်ႉၼႆႉ ၽၢႆႇလႂ် ၽူႈလႂ်ပေႉပုၼ်ႈမႃးၵေႃႈ မၼ်းတိုၼ်းလႆႈၵိၼ် တင်းသွင်ၽၢႆႇ၊ ၽႂ်ၶႂ်ႈပေႉပေႉ၊ ၽႂ်ၶႂ်ႈသုမ်းသုမ်း တွၼ်ႈတႃႇၶႄႇၶဝ်တေႉ တိုၼ်းတေလႆႈမီး ၼမ်ႉမျၢတ်ႈ ၼမ်ႉတွၼ်းၼမ်လိူဝ်ပိူၼ်ႈသုတ်း ၼႆၼၼ်ႉယဝ်ႉ။ သင်တူၺ်းဢဝ် ပိူင်ပဵၼ်မိူင်း ဢပ်ႉၾၵၼ်ႇၼိသ်ႉသတၢၼ်ႇၵေႃႈ ႁူႉလီၼႃႇယဝ်ႉ။ ၽၢႆႇလူင်ပွင်ၸိုင်ႈ ဢပ်ႉၾၵၢၼ်ႇၵေႃႈ မၼ်းၶဝ်ႈႁႃ၊ ၽၢႆႇတႃႇလီႇၿၢၼ်ႇၵေႃႈ မၼ်းၸွႆႈထႅမ်၊ ၽၢႆႇလႂ်ပေႉၵေႃႈ ၶႄႇ တိုၼ်းတေလႆႈၵိၼ်တႃႇသေႇၼၼ်ႉယဝ်ႉ။

ပေႃးၸိူင်ႉၼၼ် ၼႃႈလိၼ် မိူင်းတႆး ပွတ်းႁွင်ႇၼႆႉ လီမႆႈၸႂ်တၢင် ပုၼ်ႈတႃႇ ပီႈၼွင်ႉ ၸၢဝ်းၶိူဝ်း ၼႂ်းမိူင်းတႆးႁဝ်းတေႉတေႉ။ ပီႈၼွင်ႉၸၢဝ်းၶိူဝ်း ဢၼ်ယူႇၼိူဝ်ၽႅၼ်ႇလိၼ်တႆး ၼႂ်းၼႃႈမိူင်း ပွတ်းႁွင်ႇၼႆႉ တေထုၵ်ႇတၢင်း လူင်ပွင်ၸိုင်ႈၶႄႇ လႄႈ ၵုမ်ႇပၼ်ႇၼီႇၶႄႇ လူလၢႆ ဢဝ်တၢႆ ပူၼ်ႉပႅၼ် သုၼ်ႇလႆႈ သုၼ်ႇပဵၼ်ၵူၼ်း၊ ဢဝ်လၢႆ တီႈႁႆႈ တီႈသူၼ် လႄႈ တေလႆႈထုၵ်ႇၶႄႇ ဢူမ်ဢိုၼ် ဢမ်ႇႁၢင်ႉ ဢမ်ႇၵၢတ်ႈတေႉယဝ်ႉ။

Credit

Tuen Harn Media

17 November 2021