တၢင်းႁၼ်ထိုင် ထုၼ်းမျၢတ်ႉၼၢႆႇ လွင်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း

 တၢင်းႁၼ်ထိုင် ထုၼ်းမျၢတ်ႉၼၢႆႇ လွင်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း

February 10, 2022

ထၢမ်။   ။ လွင်ႈဢၼ်ၸၢဝ်းၶိူဝ်း ၼႂ်းမိူင်းမၢၼ်ႈ ႁဵတ်းၵၢၼ်တေႃႇသူႈမၢၼ်ႈမႃး ၶၢဝ်းတၢင်း (75) ပီၼႆႉ ၵွပ်ႈသင်လႄႈ ဢမ်ႇလႆႈလွင်ႈဢွင်ႇပွႆးသေပွၵ်ႈၶႃႈ။

တွပ်ႇ။   ။ ၼႂ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၵမ်ႈပႃႈၼမ်ၼႆႉ ၶဝ်ဢမ်ႇၸႂ်ႈၽူႈလုၵ်ႉၽိုၼ်ႉမၢၼ်ႈ လႄႈ ဢမ်ႇၶႂ်ႈလႆႈလွင်ႈလွတ်ႈလႅဝ်း။ ၶဝ်ပဵၼ်ၸုမ်း ဢၼ်ဢိင်ၼိူဝ်ၵၢၼ်မိူင်းသေ ႁဵတ်းႁႃပုၼ်ႈသုၼ်ႇတူဝ်ၶဝ်ၵူၺ်း။

ပေႃးတႃႇသုၼ်ႇတူဝ်ၶဝ်ပေႃးၵိၼ် လႄႈ ယူႇလွတ်ႈၵႂႃႇလႆႈဝၼ်းဝၼ်းၵူၺ်းၵေႃႈ ၶဝ်ပဵင်းပေႃးၸႂ်ယဝ်ႉ။ ပေႃးဢမ်ႇလႆႈၽဵင်ႇၵၼ်၊ ၸႅၵ်ႇဝၢၵ်ႈၵၼ် ဢမ်ႇၽဵင်ႇၵေႃႈ လုၵ်ႉတိုၵ်းယိုဝ်းၵၼ်သေ ပေႃးၶိုၼ်းဢုပ်ႇၵၼ်လႆႈယဝ်ႉၵေႃႈ ယဵၼ်ၶိုၼ်းၸိူင်ႉၼၼ်ၵူၺ်း။ 

ပေႃးဢဝ်ၼႂ်းသၢႆတႃ ၵူၼ်းၼွၵ်ႈမိူင်းၶဝ်တူၺ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းႁဝ်းၼႆႉ ဢမ်ႇမီးမိူင်းလႂ် ႁၼ်ဝႃႈ ၸၢဝ်းၶိူဝ်း ပဵၼ်ၸုမ်းလုၵ်ႉၽိုၼ်ႉ တႃႇဢဝ်ၶိုၼ်းမိူင်း။ ၶဝ်ၵူၺ်းႁၼ်ဝႃႈ ပဵၼ်ၸုမ်းၸဝ်ႈပၢႆးမၢၵ်ႈမီး ဢၼ်ယိပ်းၵွင်ႈဝႆႉၼႆၵူၺ်း။

ၸုမ်းလုၵ်ႉၽိုၼ်ႉ ဢၼ်ဝႃႈၼႆႉ ပွင်ႇဝႃႈ ပဵၼ်ၸုမ်း မီးၼမ်ႉၸႂ်ႁၵ်ႉၸိူဝ်ႉၸၢတ်ႈ ၶၢမ်ႇတုၵ်ႉ ၶၢမ်ႇယၢၵ်ႈ ၶၢမ်ႇယၢပ်ႇ ၶၢမ်ႇၽိုတ်ႇ ၶၢမ်ႇၸုၼ်ႉပုၼ်ႈသုၼ်ႇတူဝ်သေ ၶဝ်ႈထိူၼ်ႇ ယိပ်းၵွင်ႈၵၢင်ႇ တႃႇလိုပ်ႈတိုၵ်းပႅတ်ႈၽူႈၶဵၼ် လႄႈ တႃႇပူၵ်းပွင်ပၼ် ၸၢတ်ႈပၢၼ်ၵူၼ်းမိူင်းယဝ်ႉ။

တူၺ်းလူး ၼႂ်းၼႃႈတီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် ဢၼ်သိုၵ်းမၢၼ်ႈ ဢမ်ႇၶဝ်ႈႁွတ်ႈလႆႈၼၼ်ႉ မီးဝႆႉတင်းၼမ်။ ၵွပ်ႈသင်လႄႈ ၼႂ်းၼႃႈတီႈၸိူဝ်းၼၼ်ႉ ဢမ်ႇၶိုၼ်ႈယႂ်ႇလႆႈသေပွၵ်ႈ။ တေႃႈၼင်ႇ ၼႂ်းၼႃႈတီႈႁဝ်း ၵုမ်းၵမ် ႁဝ်းယင်း ဢမ်ႇပူၵ်းပၼ်သင် သမ်ႉတေဝႃႈ ႁႂ်ႈပိူၼ်ႈႁွင်ႉ ၸုမ်းလုၵ်ႉၽိုၼ်ႉ ၼႆၼႆႉ ၵဝ်ၶႃႈဝႃႈတႄႉ မၼ်းပႆႇထုၵ်ႇ။

ၶၢဝ်းတၢင်း (75) ပီပႆၼႆႉ ဢမ်ႇမီးၸၢဝ်းၶိူဝ်းၸုမ်းလႂ် လုၵ်ႉၽိုၼ်ႉမၢၼ်ႈမႃး ၶၢဝ်းတၢင်း (75) ပီလေႃႇ၊ ပေႃးလႆႈၵိၼ်ၵေႃႈ ၵွတ်ႇၶေႃးၵၼ်သေ ပေႃးဢမ်ႇလႆႈၵိၼ်မႃးသမ်ႉ တိုၵ်းၵၼ် မွၵ်ႈၼႆႉၵူၺ်း။ ၵွပ်ႈၼႆလႄႈ ၵဝ်ၶႃႈ ဢမ်ႇယုမ်ႇဝႃႈ ၸၢဝ်းၶိူဝ်းယိပ်းၵွင်ႈၵၢင်ႇၸိူဝ်းၼႆႉ ပဵၼ်ၸုမ်းလုၵ်ႉၽိုၼ်ႉမၢၼ်ႈ။ ဢမ်ႇမီးလေႃႇ ၸုမ်းလုၵ်ႉၽိုၼ်ႉမၢၼ်ႈ။ မီးၸုမ်းၸဝ်ႈပၢႆးမၢၵ်ႈမီးၶဝ်ၵူၺ်း။

ထၢမ်။   ။ ၸုမ်းၸဝ်ႈႁဝ်းၶဝ် ဢၼ်တိုၵ်ႉႁႃတႄႇတင်ႈမႃးထႅင်ႈမႂ်ႇမႂ်ႇၼႆႉၶႃႈလူး မီးယိူင်းဢၢၼ်းသင်ၽွင်ႈ လႄႈ ၸွင်ႇဢၢၼ်းပဵၼ်ၸုမ်းလုၵ်ႉၽိုၼ်ႉမၢၼ်ႈတႄႉတႄႉယူႇႁိုဝ်

တွပ်ႇ။   ။ မီးယိူင်းဢၢၼ်း ဢမ်ႇမီးယိူင်းဢၢၼ်း လႄႈ ၸွင်ႇၸႂ်ႈၸုမ်းလုၵ်ႉၽိုၼ်ႉမၢၼ်ႈတႄႉတႄႉႁႃႉၼႆၼၼ်ႉ သူၸဝ်ႈၵေႃႈ ႁၼ်တႂ်ႈၼႃႈတႂ်ႈတႃယဝ်ႉလူး ဝႃႈ ၵဝ်ၶႃႈ ဝၢင်းၽႅၼ်သင်ယူႇ တီႈၼႂ်းမိူင်းရၶႅင်ႇႁဝ်း။ ၵဝ်ၶႃႈ တင်ႈတပ်ႉသိုၵ်းမႃး ဢမ်ႇထိုင် 4 ပီ သိုၵ်းလူင်ပွင်ၸိုင်ႈမၢၼ်ႈ ဢဝ်လွၵ်းလၢႆးၵူႈလၢႆးလၢႆးသေ ၶတ်းၸႂ်ၽဵဝ်ႈၵဝ်ၶႃႈ ၶၢဝ်းတၢင်း 3 ပီတဵမ် ဢမ်ႇလႆႈ၊ ထိုင်တီႈပေႃးလႆႈမႃးယွမ်းဢုပ်ႇ လွင်ႈငမ်းယဵၼ် ၸွမ်းၵဝ်ၶႃႈၼႆႉ သူတေဝႃႈ ၵဝ်ၶႃႈ ဢမ်ႇၸႂ်ႈၽူႈလုၵ်ႉၽိုၼ်ႉမၢၼ်ႈၼႆႁႃႉ

ၸူဝ်ႈၵဝ်ၶႃႈ သူင်ႇသိုၵ်းလူင်းမႃးၶိုၼ်း မိူင်းရၶႅင်ႇႁဝ်းၼႆႉ လိူဝ်သေပၢင်တိုၵ်း ၼႂ်းၵႄႈသိုၵ်းႁဝ်း လႄႈ လူင်ပွင်ၸိုင်ႈယဝ်ႉ ၸွင်ႇသူယၢမ်ႈႁၼ် ပၢင်တိုၵ်းသင်ထႅင်ႈႁိုဝ်။ ၸွင်ႇႁၼ်ၸုမ်း PDF မီးၼႂ်းမိူင်းႁဝ်းႁိုဝ်။ ၸွင်ႇယၢမ်ႈႁၼ် ၸၢဝ်းၶိူဝ်းၶဝ်ၼင်ႇၵၼ် တိုၵ်းၵၼ်တင်းမၢၼ်ႈ ဢမ်ႇၼၼ် တင်းႁဝ်းသေပွၵ်ႈႁိုဝ်။

တွပ်ႇ။   ။ ဢမ်ႇယၢမ်ႈႁၼ်ၶႃႈ။ ဢမ်ႇမီးၶႃႈ။

ထုၼ်းမျၢတ်ႉၼၢႆႇ ။   ။ လိူဝ်သေ သိုၵ်းႁဝ်း လႄႈ သိုၵ်းမၢၼ်ႈ ပဵၼ်ပၢင်တိုၵ်းၵၼ်ယဝ်ႉ လွင်ႈဢမ်ႇမီးၸုမ်းလႂ် ႁတ်းမႃးတိုၵ်းႁဝ်း၊ လွင်ႈဢမ်ႇမီးၽႂ်လႂ် ႁတ်းမႃးတင်ႈ ၸုမ်း PDF ၼႂ်းမိူင်းရၶႅင်ႇႁဝ်းၼႆႉ မၼ်းမၢႆထိုင်ဝႃႈ မိူင်းရၶႅင်ႇ ႁူဝ်ပၢၵ်ႇလႂ် 90 ပုၼ်ႈၼႆႉ ပဵၼ်ႁဝ်းၵုမ်းၵမ်လႆႈမူတ်းယဝ်ႉဢိူဝ်ႈ ၼႆၼၼ်ႉၵူၺ်း။